បន្ទាយមានជ័យ
៖ អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា (OHCHR) លោកស្រី Matilda
Bogner តំណាងប្រចាំប្រទេស រួមនឹងប្រតិភូ មកបំពេញបេសកម្មនៅ
ខេត្តបន្ទាយមានជ័យ ព្រមទាំង បានជួបពិភាក្សាជាមួយ ឯកឧត្តម អ៊ុំ រាត្រី អភិបាល នៃ
គណៈអភិបាលខេត្តបន្ទាយមានជ័យ
ដើម្បីស្វែងយល់អំពីស្ថានភាពបច្ចុប្បន្នរបស់ជនស៊ីវិលកំពុងបន្តរស់នៅតាមទីតាំងបណ្តោះអាសន្ន
ដែលមិនទាន់អាចត្រឡប់ទៅកាន់ទីតាំងដើមរបស់ពួកគាត់វិញបាន
ចាប់តាំងពីមានភាពតានតឹងដោយសារជម្លោះព្រំដែនរវាងប្រទេសកម្ពុជា និងប្រទេសថៃ
ជាពិសេសអំពីសិទ្ធិមនុស្សក្នុងការវិលត្រឡប់ទៅកាន់ទីតាំងដើមរបស់ពួកគាត់វិញ
ស្របតាមច្បាប់សិទ្ធិមនុស្ស និង ច្បាប់មនុស្សធម៌អន្តរជាតិ។
កិច្ចប្រជុំ
នេះប្រារព្ធធ្វើឡើងនៅសាលប្រជុំ ខ សាលាខេត្តបន្ទាយមានជ័យ នៅព្រឹកថ្ងៃទី១៧
ខែវិច្ឆិកា ឆ្នាំ ២០២៦ ។
នាឱកាសនោះ
ឯកឧត្ដម អ៊ុំ រាត្រី ក៏បានជម្រាបជូនដល់
តំណាងអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា (OHCHR) នូវបច្ចុប្បន្នភាពបងប្អូនជនភៀសសឹក
ដែលត្រូវយោធាថៃកាប់កាន់ភូមិឋានទាំង៦ភូមិ ដែលមិនទាន់អាចវិលត្រលប់ទៅលំនៅឋានវិញបាន
មកទល់ពេលនេះមានចំនួន ៣.៣១៨ គ្រួសារស្មើនឹងមនុស្សរាយចំនួន១៣.២៥៩នាក់/ស្រី៦.៦៤២នាក់
កុមារ៣.៤១៦នាក់។
ឯកឧត្តម
អភិបាល ខេត្តបន្ទាយមានជ័យ ក៏បានបញ្ជាក់ថា
ដោយមានការគិតគូរយកចិត្តទុកដាក់ខ្ពស់ពីសំណាក់ សម្តេចមហាបវរធិបតី ហ៊ុន ម៉ាណែត
នាយករដ្ឋមន្រ្តីនៃព្រះរាជាណាចក្រកម្ពុជា
បានប្រគល់ភារកិច្ចឱ្យក្រុមការងារចំពោះកិច្ចធ្វើការរៀបចំដីដើម្បីសាងសង់ផ្ទះ
ជូនពួកគាត់រស់នៅឱ្យបានប្រសើរជាងមុនភូមិរង់ចាំ ស្ថិតនៅឃុំស្លក្រាម ឃុំស្លក្រាម
ស្រុកស្វាយចេក ដោយផ្តល់ដីទំហំ២០មX៣០ម ក្នុង១គ្រួសារ សាងសង់ផ្ទះ ទំហំ៥មX៧ម
លើផ្ទៃដីចំនួន៤០០ ហិកតា។
លោកស្រី Matilda Bogner ក៏បានអរគុណដល់អាជ្ញាធរខេត្ត
ដែលបានជួយសម្របសម្រួលទៅដល់ក្រុមការងាររបស់លោកស្រី
ក្នុងការចុះជួបដោយផ្ទាល់ជាមួយបងប្អូនភៀសសឹកនៅក្នុងភូមិរង់ចាំ
ដែលមិនទាន់អាចវិលត្រលប់ទៅលំឋានរបស់ពួកគាត់វិញបាន ដែលរងផលប៉ះពាល់ដោយសារ ញ្ហាព្រំដែន
ដើម្បីធ្វើការប្រមូលព័ត៌មាន ក៏ដូចជាបញ្ហាដែលពួកគាត់ជួបប្រទះដោយសារបញ្ហាព្រំដែន។
លោកស្រីបញ្ជាក់ថា ឧត្តមស្នងការ អង្គ ការសហប្រជាជាតិ បានយកចិត្តទុកដាក់លើបញ្ហាព្រំដែននៃប្រទេសទាំងពីរ ដើម្បីស្វះស្វែងរកវិធីសាស្ត្រ ចូលរួមចំណែកជាមួយភាគីទាំងពីរ ដើម្បីធ្វើឱ្យបញ្ហាព្រំដែន មានភាពល្អប្រសើរឡើងវិញ៕














