ឯកឧត្តម អ៊ុំ រាត្រី អញ្ជើញប្រគល់ផ្ទះពីរខ្នង ជូនពលរដ្ឋមានជីវភាពខ្វះខាត២គ្រួសារ ក្នុងក្រុងសិរីសោភ័ណ

បន្ទាយមានជ័យ ៖ ឯកឧត្តម អ៊ុំ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ និងលោកជំទាវ ជ័យ ណារី អ៊ុំរាត្រី អមដំណើរដោយក្រុមការងារសាខាកាកបាទក្រហមកម្ពុជាខេត្ត អនុសាខា អញ្ជើញប្រគល់ផ្ទះពីរខ្នង ជូនលោកតា មេឃ អឿម អាយុ៨២ឆ្នាំ ជាគ្រួសារក្រីក្រ នៅភូមិដីឡូតិ៍ និងលោកយាយ ហ៊ាប យាវ រស់នៅ ភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ នាថ្ងៃទី១១ ខែកញ្ញា ឆ្នាំ២០២៦។

ឯកឧត្តម អ៊ុំ រាត្រី បានពាំនាំប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែនប្រធានកាកបាទក្រហមកម្ពុជា និងលោកជំទាវបណ្ឌិត ពេជចន្ទ មុន្នី ហ៊ុនម៉ាណែត អនុប្រធានអចិន្ត្រៃយ៍កាកបាទក្រហមកម្ពុជា ដែលសម្តេច និងលោកជំទាវបណ្ឌិត តែងតែគិតគូរពីសុខទុក្ខរបស់ បងប្អូន ជានិច្ច។

ឯកឧត្តមមានប្រសាសន៍ថា ក្នុងនាមកាកបាទក្រហមកម្ពុជា តែងតែនៅក្បែរ និងយកចិត្តទុកដាក់ខ្ពស់បំផុតចំពោះសុខទុក្ខ និងជីវភាពរស់នៅរបស់បងប្អូនប្រជាពលរដ្ឋ ជាពិសេសលោកយាយ លោកតា ចាស់ជរា ជនពិការ ស្ត្រីមេម៉ាយ និងគ្រួសារដែលមានជីវភាពខ្វះខាតដោមិនទុកបងប្អូនណាម្នាក់ចោលឡើយ។

ជាមួយគ្នានោះឯកឧត្តម ក៏បានក្រើនរំលឹកដល់បងប្អូនប្រជាពលរដ្ឋ ត្រូវមានការប្រុងប្រយ័ត្នចំពោះខ្លួនឯង ក៏ដូចជាកូនចៅតូចៗ ពីជម្ងឺគ្រុនឈាមដោយត្រូវចូលរួមលុបំបាត់ជម្រកមសខ្លា ហើយប្រសិនបើមានអាការៈសង្ស័យថាមានជំងឺគ្រុនឈាមត្រូវរួសរាន់ធ្វើតេស្តឈាម ដើម្បីធ្វើការព្យាបាលឱ្យបានទាន់ពេលវេលា។

សូមបញ្ជាក់ថា គ្រួសារទាំង២ដែលទទួលបានផ្ទះ រួមមាន ១-ឈ្មោះ មេឃ អឿម ភេទប្រុស អាយុ៨២ឆ្នាំ មានបន្ទុកគ្រួសារ ចំនួន៥នាក់(ស្រី៣នាក់), ២-លោកយាយ ហ៊ាប យាវ អាយុ៦៩ឆ្នាំ មានបន្ទុកគ្រួសារចំនួន១០នាក់(ស្រី៥ នាក់) រស់នៅក្នុងសង្កាត់ទឹកថ្លា ក្រុងសិរីសោភ័ណ បន្ទាយមានជ័យ ។ ក្នុងនោះមួយគ្រួសារទទួលបានអំណោយបន្ថែម អង្ករ ៥០គីឡូក្រាម គ្រឿង ឧបភោគ បរិភោគ សម្ភារៈ ប្រើប្រាស់រួមនឹងថវិកាមួយចំនួន។ ស្រ្តីមានផ្ទៃពោះ ៧នាក់ ក្នុងម្នាក់ ទទួលបានឃីតសុខភាព ០១កញ្ចប់ ថវិកាមួយចំនួន ។ ដោយឡែកបងប្អូនពលរដ្ឋដែលបានចូលរួម ទទួលបាន ភួយ ចំនួន១, ក្រមា ចំនួន ១ រួមនឹងថវិកាមួយចំនួនផងដែរ៕