ប្រជាពលរដ្ឋងាយរងគ្រោះបំផុតចំនួន ១៣គ្រួសារនៅស្រុកមោងឬស្សី ទទួលបានអំណោយមនុស្សធម៌របស់សប្បុរសជនតាមរយៈ អនុសាខាកាកបាទក្រហមកម្ពុជាស្រុកមោងឬស្សី

បាត់ដំបង ៖ ដោយអនុវត្តន៍តាមអនុសាសន៍ របស់ឯកឧត្តម សុខ លូ ប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង នៅព្រឹកថ្ងៃទី៩ ខែកញ្ញា ឆ្នាំ២០២៦នេះ លោក ឡុង សុភឺន ប្រធានស្តីទីគណៈកម្មាធិការអនុសាខាកាកបាទក្រហមកម្ពុជា ស្រុកមោងឬស្សី  និងសហការី បានចុះសួរសុខទុក្ខនិងនាំយកអំណោយមនុស្សធម៌របស់សប្បុរសជន ផ្តល់ជូនគ្រួសារប្រជាពលរដ្ឋ ងាយរងគ្រោះបំផុត ( ចាស់ជរា ជំងឺរ៉ាំរៃ ជនមានពិការភាព ស្រ្តីមេម៉ាយកូនច្រើន គ្រួសារទីទាល់ក្រ)ដែលកំពុងជួបការលំបាកក្នុងជីវភាពរស់នៅប្រចាំថ្ងៃ ចំនួន ១៣គ្រួសារ មកពីឃុំមោង និងឃុំគារ  ស្រុកមោងស្សី  ខេត្តបាត់ដំបង។

មានមតិសំណេះសំណាលនាឱកាសនោះលោក ឡុង សុភឺន បានពាំនាំនូវប្រសាសន៍ផ្តាំផ្ញើរបស់ឯកឧត្តម សុខ លូ អភិបាលខេត្តនិងជាប្រធានគណៈកម្មាធិការសាខាខេត្ត ពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្ដាំផ្ញើសួរសុខទុក្ខ ក្តីនឹករលឹក អាណិតស្រឡាញ់ យ៉ាងជ្រាលជ្រៅ និងគិតគូរជានិច្ចចំពោះសុខទុក្ខរបស់បងប្អូនប្រជាពលរដ្ឋដែលជួបការលំបាកដោយមិនប្រកាន់ពីនិន្នាការណាមួយឡើយ។

ជាមួយគ្នានេះ លោកប្រធានអនុសាខា បានផ្តាំផ្ញើបងប្អូនទាំងអស់ សូមយកចិត្តទុកដាក់ថែទាំសុខភាព រក្សាអនាម័យឱ្យ បានល្អ ជាពិសេសត្រូវបរិភោគ ឱ្យបានត្រឹមត្រូវ ផឹកស្អាត ហូបស្អាត រស់នៅស្អាត និងចូលរួមថែរក្សាបរិស្ថាន និងជីវៈចម្រុះនៅទីនេះឱ្យបានគង់វង្ស ហើយត្រូវចេះស្រឡាញ់គ្នា សាមគ្គីគ្នា និងជួយយកអាសារគ្នាទៅវិញទៅមកក្នុងនាមខ្មែរ តែមួយនិងសូមប្រុងប្រយ័ត្នក្មេង ពីសត្វ អាសិរពិសផ្សេងៗ និងត្រៀមបង្ការពីផលប៉ះពាល់ដែលបណ្តាលមកពីការប្រែប្រួលអាកាស និងចូលគោរពច្បាប់ចរាចរណ៍ផ្លូវគោក និងជៀសអោយឆ្ងាយពីគ្រឿងញៀនគ្រប់ប្រភេទ ហើយបើទោះបីជាបងប្អូនមានជីវភាពលំបាកយ៉ាងណាក៏ដោយ ក៏សូមឱ្យបងប្អូនប្រជាពលរដ្ឋខិតខំជម្នះការលំបាកតស៊ូ ជំរុញកូនរបស់ខ្លួនឱ្យទៅសាលារៀន ទទួលបានការអប់រំ មានចំណេះដឹងខ្ពង់ខ្ពស់ដើម្បីកាត់បន្ថយបាននូវភាពក្រីក្រ។

អំណោយដែលត្រូវផ្តល់ជូនរួមមាន ៖ អង្ករ២៥គីឡូក្រាម ,ទឹកត្រី០១យួរ, ទឹកស៊ីអ៊ីវ០១យួរ ,មី០១កេស ,ឃីត០១កញ្ចប់ (មុង០១, ភួយ០១, កន្ទេល០១, ខ្នើយ០១, ក្រមា០១, សារ៉ុង០១) និងថវិកាមួយចំនួន ។ ដោយឡែក០១គ្រួសារកុមារីឈ្មោះ ម៉ន វណ្ណា ភេទស្រី អាយុ ១៣ឆ្នាំរស់នៅភូមិកោះថ្កូវ ឃុំគារ ទទួលបានបន្ថែមកង់០១គ្រឿង (ឧបត្ថម្ភដោយអង្គការOEC)ផងដែរ ៕

ដោយ ៖ សាលី