បាត់ដំបង ៖
យ៉ាងហោចណាស់បុរស០២នាក់បានរងរបួសធ្ងន់
ស្រាលនៅក្នុងហេតុការណ៍គ្រោះថ្នាក់ចរាចរណ៍រវាងរថយន្តនិងម៉ូតូ០២គ្រឿងនៅវេលាម៉ោង
១៦និង៣៥នាទី ថ្ងៃទី១៩ ខែសីហា ឆ្នាំ២០២៦ នៅចំណុចក្បែររង្វង់មូលវិមានឯករាជ្យ
ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង។
ប្រភពនៅកន្លែងកើតហេតុបានអោយដឹងថា
ករណីគ្រោះថ្នាក់ចរាចរណ៍ខាងលើនេះបានកើតឡើងរវាងម៉ូតូម៉ាក ZOOMER-Xពណ៌ខៀវមួយគ្រឿង ពាក់ផ្លាកលេខ បាត់ដំបង1Y-3988 បើកបរដោយបុរសវ័យចំណាស់ម្នាក់
ទិសដៅពីជើងទៅត្បង ចំណែករថយន្តម៉ាក LEXUS. 300ពណ៌ស
មិនស្គាល់ផ្លាកលេខ (បើកបរបញ្ច្រាសផ្លូវ)ទិសដៅពីត្បូងទៅជើង
បានជ្រុលមកប៉ះម៉ូតូខាងលើបណ្តាលអោយដួលបោកក្បាលសន្លប់ស្តូកស្តឹង
ភ្លាមនោះក៏មានម៉ូតូមួយគ្រឿងផ្សេងទៀតម៉ាក WAVE ពណ៌ខ្មៅ
ពាក់ផ្លាកលេខ បាត់ដំបង1AY- 2607បើកបរដោយបុរសម្នាក់ទិសដៅស្របគ្នាពីជើងទៅត្បូង
បានជ្រុលមកបុកពីក្រោយម៉ូតូខាងលើពេញទំហឹងបណ្តាលអោយដួលរងរបួសស្រាល ចំណែករថយន្តបន្តបើកគេចខ្លួនបាត់ស្រមោល។
ក្រោយពេលកើតហេតុជនរងគ្រោះត្រូវបានក្រុមគ្រួសារដឹកបញ្ជូនទៅព្យាបាលនៅមន្ទីរពេទ្យ
ចំណែកមធ្យោបាយទាំងពីរត្រូវបានសមត្ថកិច្ចជំនាញចុះមកវាស់វែងធ្វើកំណត់ហេតុចាត់ការតាមនីតិវិធី
ដោយឡែករថយន្តបង្កហេតុត្រូវបានសមត្ថកិច្ចកំពុងធ្វើការស្រាវជ្រាវបន្ត ៕
ដោយ ៖ សាលី