បន្ទាយមានជ័យ ៖ ឃុំគោកបង្ល័ង ដែលជាឃុំមួយនៅដាច់ស្រយាលពីទីប្រជុំខេត្ត
ជាប់នឹងតំបន់បឹងទន្លេសាប ស្ថិតក្នុងស្រុកមង្គលបូរី ខេត្តបន្ទាយមានជ័យ កំពុងតែប្រែមុខមាត់ថ្មី
ដែលធ្លាប់តែងងឹតតាមផ្លូវនៅពេលរាត្រី ត្រូវបានភ្លឺនិងមានសោភ័ណភាពតាមរយៈការបំពាក់ភ្លើងបំភ្លឺសូឡា
ចំនួន៣១៥បង្គោល ដែលអាជ្ញាធរឃុំទទួលបានពីក្រុមការងារចុះជួយមូលដ្ឋានឃុំ ផ្តល់អោយនិងបានចាត់ចែងដាក់តាមផ្លូវមេ
និងតាមផ្លូវបំបែកតូចៗ ។
លោក ម៉ៅ សំអុន មេឃុំគោកបល័្លង្គ បានអោយដឹងថា
ដោយទទួលបានការឧបត្ថម្ភនូវបង្គោលដែក និងភ្លឺងបំភ្លឺសូឡាពីឯកឧត្តម តាន់ ផាន់ណារ៉ា
អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ
និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកមង្គលបូរី
ចំនួន៣១៥បង្គោលភ្លើងសូឡា ដើម្បីអោយឃុំយកទៅដាំដាក់អមសងខាងផ្លូវទូទាំង៨ភូមិនៃឃុំ ។
លោកបានបន្តថា ដើម្បីអោយមានសោភ័ណភាព និងរបៀបរៀបរយលោកបានប្រគល់អោយទៅលោកមេភូមិទាំង៨
សហការជាមួយមួយក្រុមយុវជន ដោយមានការសម្របសម្រួលពីក្រុមការងារឃុំធ្វើយ៉ាងណា ដាំអោយការដាក់ត្រង់ជួរនិងកុំប៉ះពាល់ដល់ផ្ទះពលរដ្ឋ
។ ជំហានដំបូងនៃការដាក់បង្គោលភ្លើងសូឡានេះ គឺ ដាក់តាមផ្លូវលេខ៥៦C ដែលជាផ្លូវមេតភ្ជាប់ពីផ្លូវជាតិលេខ៥ ត្រង់ចំនុចផ្សារអូរស្ងួត
។
បើតាមប្រសាសន៍របស់ឯកឧត្តម តាន់ ផាន់ណារ៉ា តាមរយៈលោកមេឃុំ លោកនឹងផ្តល់ភ្លើងសូឡាននេះបន្ថែមទៀត
ដើម្បីបំពាក់អោយគ្រប់តាមផ្លូវទូទាំងភូមិទាំង៨ នៃឃុំគោកបល្ល័ង្គ ធ្វើយ៉ាងណាអោយទូទាំងឃុំភ្លឺបំព្រងនៅពេលយប់
។ ក្រៅពីការផ្តល់នៅភ្លឺងសូឡាឯកឧត្តម តាន់ ផាន់ណារ៉ា អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកមង្គលបូរី
បានផ្តល់ថវិការជួសជុលផ្លូវក្នុងភូមិ និងផ្តល់ថវិកាសំភារៈដល់ពលរដ្ឋក្នុងមូលដ្ឋានដែលជួបការលំបាក
។
បើតាមប្រជាពលរដ្ឋនៅក្នុងមូលដ្ឋាន នៃឃុំគោកបល្ល័ង្គ ស្រុកមង្គលបុរី បានអោយដឹងថា
ពួកគាត់សប្បាយរីករាយជាមួយសមិទ្ធិផលថ្មី នៃបង្គោលភ្លើងសូឡាដែលមិនធ្លាប់មាននៅមូលដ្ឋានរបស់ពួកគាត់
។ វាមិនថែមតែបានបំភ្លឺផ្លូវនេះទេ វាថែមទាំងធ្វើអោយឃុំមានសោភ័ណភាព
មានសុវត្ថិភាពនៅពេលធ្វើដំណើរមិនថាសិស្សសាលា ឬប្រជាពលរដ្ឋប្រកបរបររកស៊ីឡើយ ។
សូមបញ្ជក់ថា តាមលោកមេឃុំសូឡានដែលបំពាក់តាមផ្លូវខាងលើ មានតំលៃទាំងបង្គោលនិងសូឡាមានតំលៃសរុបទាំងអស់៤៥ដុល្លាក្នុងមួយដើម ៕
