បាត់ដំបង ៖
ខណៈដែលមានភ្លៀងធ្លាក់ជាប់ៗគ្នាជាបន្តបន្ទាប់នៅផ្នែកខាងលើក្នុងតំបន់ស្រុកសំឡូតព្រំដែនកម្ពុជា
ថៃ បានបង្កជាជំនន់ធ្វើអោយកម្ពស់ទឹកស្ទឹងសង្កែ នៅល្ងាចថ្ងៃទី ១៥ ខែកក្កដា
ឆ្នាំ២០២២នេះ បានហក់ឡើងរហូតជាង១៣ម៉ែត្រ។
ប្រភពពីមន្ត្រីជំនាញបានអោយដឹងថាជំនន់ទឹកស្ទឹងសង្កែហក់ឡើងលឿននេះដោយសារប៉ុន្មានថ្ងៃមកនេះមានភ្លៀងធ្លាក់នៅប៉ែកខាងលើក្នុងភូមិសាស្ត្រស្រុកសំឡូត
ធ្វើអោយទឹកបានហូរស្រុងចាក់ចូលផ្ទៃទំនប់ស្តុកទឹកសេកសកលើសចំនួនអតិបរមា
ទើបបានមន្ត្រីជំនាញបើកបន្ធូរទ្វារទឹកនៅទំនប់ពហុបំណងសេកសក ទំនប់ស្ទាក់ទឹកកង្ហត
និងបើកទ្វារទំនប់ស្ទាក់ទឹកសាលាតាអនដើម្បីបង្ហៀរទឹកដែលច្រាលនៅក្នុងស្ទឹងសង្កែទំលាក់ទៅបឹងទន្លេសាប។
មន្ត្រីជំនាញបានបញ្ជាក់ទៀតថា រហូតមកដល់រសៀលថ្ងៃទី១៥ ខែកក្កដា ឆ្នាំ២០២៦នេះ កម្ពស់ទឹកស្ទឹងបានហក់ឡើងរហូតទៅដល់១៣ម៉ែត្រ,៣តឹក ហើយអាចបន្តហក់ឡើងទៅដល់ ១៣ម៉ែត្រ ៥តឹក ខណៈដែលកម្រិតប្រកាសអាសន្ន ១៣ម៉ែត្រ ៧តឹក នេះបើតាមការអះអាងពីមន្ត្រីជំនាញ ៕
ដោយ ៖ សាលី