កំពង់ស្ពឺ
៖ ផ្លូវបេតុងក្រាលកៅស៊ូមួយខ្សែប្រវែងប្រមាណជាង៧០០០ម៉ែត្រ
ដែលស្ថាបនាដោយក្រុមហ៊ុនវិរៈប៊ុនថាំ
ស្ថិតនៅលើខ្នងភ្នំឧទ្យានជាតិព្រះសុរាម្រិតកុសមៈគីរីរម្យ ត្រូវបានដាក់សម្ពោធឱ្យប្រើប្រាស់ជាផ្លូវការកាលពីរសៀលថ្ងៃទី២៨
ខែមិថុនា ឆ្នាំ២០២៦ ដើម្បីសម្រួលដល់ការធ្វើដំណើរនៃភ្ញៀវជាតិ អន្តរជាតិ។
លោកបណ្ឌិត
ជាម ចន្ទ័សោភ័ណ អភិបាលខេត្តកំពង់ស្ពឺបានឱ្យដឹងថា ផ្លូវបេតុងក្រាលកៅស៊ូថ្មីមួយខ្សែដែលទើបនឹងស្ថាបនាថ្មីនេះគឺតភ្ជាប់ចេញពីរង្វង់នាគព័ន្ធទៅកាន់រមណីយដ្ឋានឋានសួគ៌គីរីរម្យមានប្រវែង៧០០០ម៉ែត្រចំណាយថវិកាស្ថាបនាដោយក្រុមហ៊ុនវិរៈប៊ុនថាំ។ផ្លូវមួយខ្សែនេះគឺជាសមិទ្ធិផលថ្មីមួយបន្ថែមទៀតនៅលើខ្នងភ្នំឧទ្យានជាតិគីរីរម្យដែលរួមចំណែកផ្តល់នូវសុខសុវត្ថិភាពបន្ថែមដល់អ្នកធ្វើដំណើរនៃភ្ញៀវជាតិ
អន្តរជាតិ ពិសេសគឺបានរួមចំណែកលើកកម្ពស់ជីវភាពរស់នៅរបស់សហគមន៍មូលដ្ឋានឱ្យកាន់តែប្រសើរឡើង។
លោក ហួត
ហាក់ រដ្ឋមន្ត្រីក្រសួងទេសចរណ៍ បានលើកឡើងថា
ឧទ្យានជាតិគិរីរម្យគឺជារមណីយដ្ឋានទេសចរណ៍ធម្មជាតិមួយដ៏ល្បី
ក្នុងចំណោមរមណីយដ្ឋានឧទ្យានជាតិធំៗដទៃទៀតនៅក្នុងប្រទេសកម្ពុជា
ហើយគិរីរម្យក៏ជារមណីយដ្ឋានដែលមានកេរ្ដិ៍ឈ្មោះល្បីល្បាញខ្លាំងតាំងពីសម័យសង្គមរាស្ត្រនិយមមកម្ល៉េះ។រមណីយដ្ឋានឧទ្យានជាតិនេះ
សំបូរទៅដោយទេសភាពល្អប្រណិតលំអរដោយដើមស្រល់តូចធំដុះពីធម្មជាតិនៅលើខ្ពង់រាបគីរីរម្យ
ជ្រោះទឹកធ្លាក់ជាច្រើនអន្លើ
និងមានសត្វម្រឹគីម្រឹគាជាច្រើនអំបូរកំពុងរស់នៅទីនោះ
អមដោយខ្យល់ធម្មជាតិដែលអំណោយផលដល់ការទៅលេងកម្សាន្តនៃភ្ញៀវទេសចរជាតិ
អន្តរជាតិក្នុងមួយឆ្នាំៗប្រមាណជាង១លាននាក់។
លោក ហួត
ហាក់ គូសបញ្ជាក់ថា រមណីយដ្ឋានឧទ្យានជាតិគីរីរម្យ បច្ចុប្បន្នគឺមានការអភិវឌ្ឍន៍ខ្លាំងលើហេដ្ឋារចនាសម្ព័ន្ធនានាក្រោមការគិតគូរបស់រដ្ឋបាលខេត្តកំពង់ស្ពឺ
ដើម្បីលើកកម្ពស់វិស័យទេសចរ។ផ្ទះសំណាក់ សណ្ឋាគារ រីសត
បាននិងកំពុងបណ្តែតខ្លួនត្រៀបត្រានៅលើខ្នងភ្នំ ផ្លូវក្រាលកៅស៊ូ
និងផ្លូវបេតុងជាច្រើនខ្សែដែលតភ្ជាប់ទៅតាមតំបន់រមណីយដ្ឋានក៏ត្រូវបានស្ថាបនា
ជួសជុលឡើងវិញ ដើម្បីត្រៀមសម្រួលដល់ការធ្វើដំណើរ
ចំនេញពេលវេលាដល់ភ្ញៀវទេសចរណ៍ក្នុងការដើរកំសាន្ត
ជាក់ស្តែងផ្លូវមួយខ្សែដែលបានដាក់សម្ពោធថ្មីនេះពិតជាបានចូលរួមលើកម្ពស់វិស័យទេសចរណ៍នៅលើខ្នងភ្នំឧទ្យានជាតិគីរីរម្យឱ្យកាន់តែទាក់ទាញ់បន្ថែមទៀត។
ទន្ទឹមនិងការសម្ពោធសមិទ្ធផលថ្មីផ្លូវមួយខ្សែនេះ រដ្ឋមន្ត្រីក្រសួងទេសចរណ៍ លោក ហួត ហាក់ បានធ្វើការណែនាំផងដែរទៅដល់អាជ្ញាធរគ្រប់លំដាប់ថ្នាក់ ពិសេសមន្ទីរទេសចរណ៍ខេត្តកំពង់ស្ពឺ ត្រូវចូលរួមឱ្យបានសកម្មក្នុងការពិនិត្យតាមដានរាល់សកម្មភាពរបស់សហគមន៍ ក៏ដូចជាម្ចាស់អាជីវកម្មនានាក្នុងឧទ្យានជាតិគីរីរម្យលើការផ្តល់សេវាដល់ភ្ញៀវទេសចរ ធ្វើយ៉ាងណាជៀសវាងបង្កការថ្នាំងថ្នាក់ដល់អារម្មណ៍ភ្ញៀវមកលេងកម្សាន្តតាមរយៈការតំឡើងថ្លៃតាមទំនើងចិត្តលើការស្នាក់នៅនិងហូបចុក មួយវិញទៀតត្រូវពិនិត្យនិងចាត់វិធានការលើការសំអាត អនាម័យ បរិស្ថានតាមរមណីយដ្ឋាននានាកុំឱ្យមានសំរាមពាសវាលពាសកាលដែលនាំឱ្យប៉ះពាល់ដល់កិត្តិយស សេចក្តីថ្លៃថ្នូរនៃរមណីយដ្ឋានដ៏ល្បីល្បាញនៃយើង ៕
ដោយ ៖ ប៊ុត
សារុន