ព្រះវិហារ
៖ លោក ឃិត សុធារ៉ា អភិបាលស្រុកឆែប នៅថ្ងៃទី២៥ ខែឧសភា ឆ្នាំ២០២៦ បានដឹកនាំកម្លាំងគណៈបញ្ជាការឯកភាពរដ្ឋបាលស្រុក
ចុះពិនិត្យទីតាំង និងស្វែងរកបទល្មើស Scam
Online នៅតំបន់ជិតជុំវិញទឹកធ្លាក់ព្រះនិមិត្ត ព្រំដែនកម្ពុជា-ឡាវ
បន្ទាប់ពីមានប្រជាពលរដ្ឋរាយការណ៍អំពីសកម្មភាពគួរឲ្យសង្ស័យនៅក្នុងមូលដ្ឋាន។
ប្រតិបត្តិការនេះ
ធ្វើឡើងបន្ទាប់ពីទទួលបានបទបញ្ជាផ្ទាល់ពី ឯកឧត្តម គីម រិទ្ធី
អភិបាលនៃគណៈអភិបាលខេត្តព្រះវិហារ ដើម្បីពង្រឹងការត្រួតពិនិត្យ និងបង្ក្រាបបទល្មើស Scam Online នៅតាមតំបន់ព្រំដែន
និងទីតាំងសង្ស័យនានា ក្នុងភូមិសាស្ត្រខេត្តព្រះវិហារ។
បើតាមរដ្ឋបាលស្រុកឆែប
កម្លាំងចម្រុះបានចុះពិនិត្យយ៉ាងម៉ត់ចត់នៅតំបន់ជិតជុំវិញទឹកធ្លាក់ព្រះនិមិត្ត ព្រំដែនកម្ពុជា-ឡាវ បន្ទាប់ពីមានព័ត៌មានថា
អាចមានក្រុមជនបរទេស ឬជនជាតិចិន លាក់ខ្លួន និងប្រព្រឹត្តសកម្មភាពពាក់ព័ន្ធ Scam Online នៅក្នុងតំបន់នោះ។
ទោះជាយ៉ាងណា ជាលទ្ធផលនៃការចុះត្រួតពិនិត្យ មិនបានរកឃើញវត្តមានក្រុមជនបរទេស
ឬជនជាតិចិនពួនសំងំលាក់ខ្លួននៅក្នុងភូមិសាស្ត្រខាងលើនោះទេ។
ថ្លែងប្រាប់អ្នកសារព័ត៌មាន
លោក ឃិត សុធារ៉ា អភិបាលស្រុកឆែប បានបញ្ជាក់ថា
អាជ្ញាធរមូលដ្ឋាននៅតែបន្តអនុវត្តវិធានការតាមដាន ស្រាវជ្រាវ និងបង្ក្រាបបទល្មើស Scam Online ជាបន្តបន្ទាប់
ដោយមិនមានការយោគយល់ ឬអនុគ្រោះចំពោះសកម្មភាពខុសច្បាប់ណាមួយឡើយ
នៅក្នុងដែនសមត្ថកិច្ចដែលខ្លួនកំពុងគ្រប់គ្រង។ លោកក៏បានអំពាវនាវដល់ប្រជាពលរដ្ឋក្នុងមូលដ្ឋាន
ឲ្យចូលរួមសហការជាមួយអាជ្ញាធរ ដោយរាយការណ៍ និងផ្តល់ព័ត៌មានជាបន្ទាន់
ប្រសិនបើប្រទះឃើញក្រុមជនសង្ស័យ ឬសកម្មភាពពាក់ព័ន្ធនឹងបទល្មើស Scam Online ដើម្បីឲ្យសមត្ថកិច្ចអាចចាត់វិធានការបានទាន់ពេលវេលា។
ការចុះត្រួតពិនិត្យនេះ ធ្វើឡើងស្របពេលដែលរាជរដ្ឋាភិបាលកម្ពុជា កំពុងបង្កើនការបង្ក្រាបបទល្មើស Scam Online នៅទូទាំងប្រទេស ជាពិសេសនៅតាមតំបន់ព្រំដែន និងទីតាំងដែលអាចជាកន្លែងលាក់ខ្លួនរបស់ក្រុមឧក្រិដ្ឋជនអនឡាញ ៕
ដោយ ៖
រ៉ាស៊ី