ព្រលឹងចុងសក់ ម៉ូតូ១០គ្រឿងរងការខូចខាតធ្ងន់ធ្ងរ ក្រោយរថយន្តពីរគ្រឿងបុកគ្នាលើកំណាត់ផ្លូវជាតិលេខ៤១

កំពង់ស្ពឺ ៖ យ៉ាងហោចណាស់ម៉ូតូ១០គ្រឿង ត្រូវបានរងការខូចខាតធ្ងន់ធ្ងរ ក្រោយរថយន្តពីរគ្រឿងបានបុកគ្នានៅលើកំណាត់ផ្លូវជាតិលេខ៤១ចន្លោះគីឡូម៉ែត្រលេខ១៧-១៨ ត្រង់ចំណុចភូមិត្រាវ ឃុំទឹកល្អក់ ស្រុកគងពិសី ខេត្តកំពង់ស្ពឺ ថ្ងៃទី២៨ ឆ្នាំ២០២៦។

សមត្ថកិច្ចនិយាយថា នៅមុនពេលកើតហេតុគឺមានរថយន្តមួយគ្រឿងម៉ាកFORD RANGER XLT ពណ៌ស ពាក់ផ្លាកលេខ ភ្នំពេញ 2BN-2460 បើកបរដោយឈ្មោះ អ៊ូក ចិនស៊ីញ (ជនជាតិចិន) ភេទប្រុស អាយុ៤៧ឆ្នាំ ស្នាក់នៅក្នុងរោងចក្រ ស្ថិតក្នុងភូមិខ្លែងពណ៌ខាងត្បូង ឃុំព្រៃញាតិ ស្រុកគងពិសី ខេត្តកំពង់ស្ពឺ បើកបរមកពីកើតបានឆ្លងផ្លូវទៅខាងលិច ក៏ត្រូវបានរថយន្តមួយគ្រឿង ម៉ាកHYUNDAI MIGHTY ពាក់ផ្លាកលេខ ភ្នំពេញ 3B-0373 បើកបរដោយឈ្មោះ សំ ង៉ែត ភេទប្រុស អាយុ៣៩ឆ្នាំ រស់នៅភូមិបឹង ឃុំព្រះខែ ស្រុកបសេដ្ឋ ខេតកំពង់ស្ពឺ បើកបរមកពីជើងទៅខាងត្បូងបានបុកពេញទំហឹង រួចបានរេចង្កូតជ្រុលទៅបុកផ្ទះជួសជុលម៉ូតូដែលស្ថិតនៅក្បែរនោះ បណ្តាលឱ្យម៉ូតូ១០គ្រឿងត្រូវបានកិនជាប់ពីក្រោមរថយន្ត និងរថយន្តមួយគ្រឿងទៀតដែលចតចោលមុខផ្ទះក្បែរនោះម៉ាកស្តារិចត្រូវបានរងការខូចខាតធ្ងន់ធ្ងរ រីឯជាងជួសជុលនិងម្ចាស់ដែលយកម៉ូតូមកធ្វើរត់ចែកជើងគ្នាទាំងព្រលឹងចុងសក់ តែមិនមាននរណាម្នាក់រងរបួសនោះទេ។

សមត្ថកិច្ចបញ្ជាក់បន្ថែមថា ករណីខាងលើ បានបណ្ដាលឱ្យបុរសជាជនជាតិដែលបើកបររថយន្តFordឆ្លងផ្លូវរងរបួសស្រាល រថយន្ត២គ្រឿងរងការខូចខាតធ្ងន់ ម៉ូតូ១០ គ្រឿងរងការខូចខាតធ្ងន់ និងរងការខូចខាតសំយ៉ាបតូបចំនួន ១ ផ្ទាំង។បច្ចុប្បន្ន វត្ថុតាងទាំងអស់កំពុងរក្សានៅកន្លែងកើតហេតុ ដើម្បីទុកឱកាសឱ្យភាគីពាក់ព័ន្ធសម្របសម្រួលគ្នា ៕

ដោយ ៖ មាស សំអូន