ឆ្លងចរន្តអគ្គីសនីបង្កជាអគ្គីភ័យឆេះរោងជ្រូក០១ខ្នង និងម៉ូតូ០១គ្រឿងនៅស្រុកបវេល

បាត់ដំបង ៖ អគ្គីភ័យបានឆាបឆេះរោងចិញ្ចឹមជ្រូកមួយកន្លែងបង្កការភ្ញាក់ផ្អើលដល់ប្រជាពលរដ្ឋចេញអន្តរាគមន៍ពន្លត់នៅវេលាម៉ោង ០៧និង០០នាទី ថ្ងៃទី០៥ ខែឧសភា ឆ្នាំ២០២៦ នៅចំណុចក្រុមទី២១ ភូមិកោះរាម ឃុំខ្នាចរមាស ស្រុកបវេល ខេត្តបាត់ដំបង ។

 

ករណីអគ្គីភ័យខាងលើនេះដែរបានបណ្តាលអោយឆាបឆេះរោងជ្រូក០១ខ្នងទំហំ ៥ម៉ែត្រx១២ម៉ែត្រ ធ្វើអំពីឈើ ដំបូលប្រក់ស័ង្កសី ឆេះខូចខាតប្រហែល៣០% រួមជាមួយសំភារៈខូចខាតមានម៉ូតូម៉ាកវេវសេរីចាស់ចំនួន០១គ្រឿងនឹងសម្ភារះមួយចំនួនទៀតគិតជាទឹកប្រាក់អស់ប្រហែល ១២លានរៀល ដែលមានម្ចាស់ឈ្មោះ រ៉ាល់ មុនី ភេទប្រុស អាយុ៤៣ឆ្នាំ រស់នៅភូមិឃុំកើតហេតុខាងលើ។

 

នៅក្នុងហេតុការណ៍គ្រោះអគ្គីភ័យខាងលើនេះដែរភ្លាមៗនោះកម្លាំងជំនាញបានចេញរថយន្ដពន្លត់អគ្គីភ័យទៅដល់កន្លែងកើតហេតុដើម្បីអន្តរាគមន៍បាញ់ពន្លត់ប៉ុន្តែចូលពុំរួច តែត្រូវបានប្រជាពលរដ្ឋនាំគ្នាជួយពន្លត់អោយរលត់ទាំងស្រុងដោយមិនបង្កអោយមានគ្រោះថ្នាក់ដល់មនុស្សឬសត្វឡើយ ៕

ដោយ ៖ សាលី