ឯកឧត្តម ព្រួញ រិទ្ធថា អញ្ជើញចុះជួបសំណេះសំណាល និងនាំយកអំណោយចែកជូនពលរដ្ឋដែលខ្វះខាតចំនួន ១១៦គ្រួសារ នៅស្រុកបវេល

បាត់ដំបង ៖ នាព្រឹកថ្ងៃទី២ ខែឧសភា ឆ្នាំ២០២៦ ឯកឧត្តម ព្រួញ រិទ្ធថា ទីប្រឹក្សាឯកឧត្តមអភិសន្តិបណ្ឌិត ស សុខា និងជាប្រធានមន្ទីរសាធារណការ និងដឹកជញ្ជូនខេត្តបាត់ដំបង និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំក្តុលតាហែន និងឃុំឃ្លាំងមាស និងលោកជំទាវ វង្ស ជីវ៉ា ព្រួញ រិទ្ធថា ព្រមទាំងសហការី ដោយមានការអញ្ជើញចូលរួមពីសំណាក់ លោក ចា សារៀង អភិបាលរងស្រុក ក្រុមប្រឹក្សាឃុំ អង្គភាពភូមិ បានអញ្ជើញចុះជួបសំណេះសំណាលសួរសុខទុក្ខ និងនាំយកអំណោយជាគ្រឿងឧបភោគបរិភោគ ចែកជូនដល់បងប្អូនប្រជាពលរដ្ឋដែលខ្វះខាតចំនួន ១១៦គ្រួសារ មកពី៦ភូមិ ក្នុងឃុំឃ្លាំងមាស នៃស្រុកបវេល។

 

ក្នុងជំនួបសំណេះសំណាលសួរសុខទុក្ខ និងនាំយកអំណោយជាគ្រឿងឧបភោគបរិភោគ ចែកជូនដល់បងប្អូនប្រជាពលរដ្ឋដែលកំពុងជួបការខ្វះខាតខាងលើនេះដែរ ឯកឧត្តម ព្រួញ រិទ្ធថា បានមានប្រសាសន៍ថា ថ្បិតតែអំណោយនាពេលនេះវាមានតិចតួចតែវាជាទឹកចិត្តចេញពីបេះបូង ហើយប្រសិនបើពុកម៉ែ បងប្អូន យាយតា មានការខូចខាតសូមរាយការណ៍ទៅកាន់មេភូមិ ឬមេឃុំ នៅក្នុងមូលដ្ឋានជាពិសេសសូមអំពាវនាវទៅដល់បងប្អូនប្រជាពលរដ្ឋទាំងអស់ សូមចូលរួមទីមួយកុំពាក់ព័ន្ធនិងជៀសអោយឆ្ងាយពីគ្រឿងញៀន,ទីពីរសូមជួយទប់ស្កាត់ និងរាយការណ៍រាល់សកម្មភាពក្មេងទំនើង, ទីបីសូមចូលរួមគោរពច្បាប់ចរាចរណ៍ ,និងទីបួនសូមចូលរួម ពហិការឈប់ប្រើប្រាស់របស់ថៃទាំងអស់គ្នា។

 

គួរបញ្ជាក់ថា អំណោយដែលត្រូវផ្តល់ជូននាពេលនេះ ក្នុងមួយគ្រួសារទទួលបាន ,អង្គរ ,ទឹកសុទ្ធ ,មី ,ទឹកស៊ីអ៊ីវ ,ទឹកត្រី ៕

ដោយ ៖ សាលី