បាត់ដំបង ៖ កម្លាំងគណៈបញ្ជាការឯកភាពខេត្តបាត់ដំបង
ដឹកនាំដោយលោក ធូ ភា អភិបាលរងខេត្ត ដោយមានការអញ្ជើញចូលរួមពីឯកឧត្តម មាស
ច័ន្ទពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្តបាត់ដំបង បានចុះប្រតិបត្តិការឡោមព័ទ្ធទីតាំងផ្ទះមួយកន្លែង
ដែលសង្ស័យថា មានជនបរទេសមកលួចស្នាក់នៅដោយខុសច្បាប់។
កិច្ចប្រតិបត្តិការខាងលើនេះ
បានធ្វើឡើងកាលពីព្រឹកថ្ងៃទី២៨ ខែឧសភា ឆ្នាំ២០២៦ រហូតដល់ថ្ងៃរសៀល
នៅចំណុចទីតាំងផ្ទះមួយកន្លែង ស្ថិតក្នុងក្រុមទី៣៥ ភូមិចំការសំរោង២
សង្កាត់ចំការសំរោង ក្រុងបាត់ដំបង ដោយបានឃាត់ខ្លួនបុរសជនបរទេសចំនួន០៦នាក់
និងជនជាតិខ្មែរ០១នាក់ផងដែរ ក្រោយពួកគេជួលផ្ទះខាងលើស្នាក់នៅដោយខុសច្បាប់
និងសង្ស័យលួចលាក់ប្រព្រឹត្តបទល្មើសឆបោកផ្សេងៗ។
ក្រោយបញ្ចប់កិច្ចប្រតិបត្តិការ ទីតាំងផ្ទះខាងលើត្រូវបានកម្លាំងមន្ត្រីជំនាញសម្រេចបិទខ្ទប់ជាបណ្តោះអាសន្ន ចំណែកជនបរទេសទាំង០៦នាក់ និងបុរសជនជាតិខ្មែរម្នាក់ ត្រូវបានសមត្ថកិច្ចរៀបចំបញ្ជូនទៅកាន់អគ្គស្នងការនគរបាលជាតិដើម្បីបន្តនីតិវិធីច្បាប់ ៕
ដោយ ៖ សាលី