បាត់ដំបង ៖ ស្របតាមអនុសាសន៍ដ៏ខ្ពង់ខ្ពស់របស់ឯកឧត្តម
នាយឧត្តមសេនីយ៍ ស ថេត អគ្គស្នងការនគរបាលជាតិ
និងការចង្អុលដឹកនាំរបស់លោកឧត្តមសេនីយ៍ទោ ដាញ់ អេងប៊ុនចាន់
ស្នងការនៃស្នងការដ្ឋាននគរបាលខេត្តបាត់ដំបង កាលពីថ្ងៃទី២២ ខែឧសភា ឆ្នាំ២០២៦
លោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង
បានដឹកនាំកម្លាំងធ្វើការស្រាវជ្រាវករណីហិង្សាបណ្តាលឱ្យរងរបួសជនរងគ្រោះនិងកាប់់បំផ្លាញទ្រព្យសម្បត្តិអ្នកដទៃមួយករណី
រហូតឈានទៅឃាត់ខ្លួនមនុស្សចំនួន ១០នាក់។
កិច្ចប្រតិបត្តិការឃាត់ខ្លួនជនសង្ស័យទាំង១០នាក់ខាងលើធ្វើឡើងបន្ទាប់ពីទទួលពាក្យបណ្តឹងពីជនរងគ្រោះឈ្មោះ
ហេង ហួយ ភេទប្រុស អាយុ១៩ឆ្នាំ មានទីលំនៅភូមិភ្ញាវ ឃុំត្រែង ស្រុករតនៈមណ្ឌល
ខេត្តបាត់ដំបង
ថាមានករណីហិង្សាបណ្តាលឱ្យគាត់រងរបួសនិងកាប់យកផ្លាកលេខម៉ូតូរបស់គាត់កាលពីវេលាម៉ោង១៨
និង០០នាទី ថ្ងៃទី២១ ខែឧសភា ឆ្នាំ២០២៦ នៅចំណុចក្រុមទី១០ ភូមិគោកពន្លៃ
សង្កាត់អូរម៉ាល់ ក្រុងបាត់ដំបង
ខណៈដែលគាត់កំពុងជិះម៉ូតូលើដងផ្លូវដោយពុំបានដឹងរឿងនិងពុំមានទំនាស់អ្វីសោះជាមួយអ្នកប្រព្រឹត្តិ
។
លោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង បានឱ្យដឹងថា
ក្រោយពេលឃាត់ខ្លួនយកមកសាកសួរពួកគេទាំង១០នាក់បានឆ្លើយសារភាពថាជនរងគ្រោះដែលពួកគេធ្វើសកម្មភាពទៅលើនេះ
មិនមែនជាគូរទំនាស់របស់ពួកគេទេ ពោលគឺធ្វើសកម្មភាពកាប់ច្រឡំមនុស្ស
ដោយសារជនរងគ្រោះជិះម៉ូតូមានភិនភាគដូចគ្នាទៅនឹងគូរទំនាស់របស់ខ្លួនដែលមានទំនាស់គ្នាតាំងពីពេលមុនមក
។
បច្ចុប្បន្នជនសង្ស័យទាំង១០នាក់ពេលនេះត្រូវបានសមត្ថកិច្ចបញ្ជូនមកកាន់ផែនជំនាញដើម្បីអនុវត្តបន្តតាមនីតិវិធីច្បាប់ហើយ៕
ដោយ ៖ សាលី