ព្រះវិហារ ៖ បន្ទាប់ពីមានការចុះផ្សាយពីការកាប់បំផ្លាញព្រៃឈើនៅតំបន់ព្រៃឡង់
មន្ត្រីជំនាញនៃមន្ទីរបរិស្ថានខេត្តព្រះវិហារ បានចុះស្រាវជ្រាវរហូតឃាត់ខ្លួនជនសង្ស័យ
ចំនួន០២នាក់ គោយន្តដឹកឈើប្រណិត ២គ្រឿង និងវត្ថុតាងមួយចំនួន ។
លោក មឿន សុភេទ
ប្រធានមន្ទីរបរិស្ថានខេត្តព្រះវិហារ បានឲ្យដឹងនៅព្រឹកថ្ងៃទី១៣ ខែឧសភា ឆ្នាំ២០២៦ ថា
នៅថ្ងៃទី១២ ខែឧសភា ឆ្នាំ២០២៦ មន្ត្រីឧទ្យានុរក្សប្រចាំស្នាក់ការរងភ្នំកូនឆ្កែ
ស្នាក់ការស្រែវាល និងស្នាក់ការរងពើក នៃដែនជម្រកសត្វព្រៃ ព្រៃឡង់ ចំនួន៧នាក់ បានចុះល្បាតបង្រ្កាបបទល្មើសធនធានធម្មជាតិ
នៅក្នុងព្រៃសហគមន៍បង្កនសែនជ័យ ទៅដល់ចំណុចព្រៃល្បើក និយាមកាលេខ (៥៤១០៥០-១៥១៤២៩៦)
ស្ថិតនៅក្នុងភូមិបង្កន ឃុំរៀបរយ ស្រុករវៀង ខេត្តព្រះវិហារ ជាទីតាំងដែលបណ្តាញសហគមន៍ព្រៃឡង់
និងសារព័ត៌មានបានចុះផ្សាយអំពីការកាប់ឈើនៅតំបន់នោះ ។
លោកបន្តថា បន្ទាប់ពីបានស្រាវជ្រាវ
ឈានដល់ការឃាត់ខ្លួនសង្ស័យចំនួន០២នាក់ កំពុងបើកគោយន្តកន្ត្រៃដឹកឈើ ចំនួន០២គ្រឿង
ជាប្រភេទឈើអារលេខមួយ (សុក្រំ)ចំនួន១,៥០ម៉ែត្រគីប រួមជាមួយវត្ថុតាងរណាយន្ត ០១គ្រឿង និងអាវុធកែច្នៃប្រើហ្គាស
០១ដើម។
បច្ចប្បន្នជនសង្ស័យ
និងវត្ថុតាងត្រូវបានមន្ត្រីជំនាញបានយកមករក្សាទុកនៅស្នាក់រងពើក
និងកំពុងកសាងសំណុំរឿង បញ្ជូនជនទៅតុលាការដើម្បីចាត់ការបន្តតាមផ្លូវច្បាប់៕
ដោយ ៖ រ៉ាស៊ី