បាត់ដំបង ៖
រថយន្តដឹកទឹកសុទ្ធរបស់ក្រុមហ៊ុនវ៉ៃវ៉ៃមួយគ្រឿងបើកបរខ្វះការប្រុងប្រយ័ត្នបានជ្រុលទៅបុករថយន្តដឹកអេស្កាវ៉ាទ័រពីក្រោយពេញទំហឹងបណ្តាលអោយទាំងតៃកុងនិងព្រូ០៣នាក់រងរបួសធ្ងន់ស្រាលនៅវេលាម៉ោង
០៨និង៣០នាទី ថ្ងៃទី០៨ ខែមីនា ឆ្នាំ២០២៦ នៅតាមបណ្តោយផ្លូវជាតិលេខ៥ ស្ថិតក្នុងភូមិពពាលខែ
ឃុំអូរតាគី ស្រុកថ្មគោល ខេត្តបាត់ដំបង ។
ប្រភពនៅកន្លែងកើតហេតុបានអោយដឹងថា
ករណីគ្រោះថ្នាក់ចរាចរណ៍ខាងលើនេះបានកើតឡើងរវាងរថយន្តម៉ាក HYUNDAI
MIGHTY ពណ៌ស០១គ្រឿង ពាក់ផ្លាកលេខ ភ្នំពេញ3F-4171 បើកបរដោយបុរសម្នាក់និងអ្នករួមដំណើរ០២នាក់ ទិសដៅពីជើងទៅត្បូង
លុះមកដល់ចំណុចកើតហេតុខាងលើបានជ្រុលទៅពីក្រោយរថយន្តធុនធំដឹកអេស្កាវ៉ាទ័រ
ពាក់ផ្លាកលេខ ភ្នំពេញ 3B-1232
បើកបរដោយបុរសម្នាក់បណ្តាលអោយក្បាលរថយន្តកំពិតគៀបជើងតៃកុងនិងព្រូជាប់រងរបួសធ្ងន់ស្រាល០៣នាក់។
ក្រោយពេលកើតហេតុ សមត្ថកិច្ចនគរបាលផ្នែកចរាចរណ៍ផ្លូវគោក នៃអធិការដ្ឋាននគរបាលស្រុកថ្មគោលចុះមកវាស់វែងធ្វើកំណត់ហេតុដើម្បីចាត់ការតាមផ្លូវច្បាប់ ៕
ដោយ ៖ សាលី