បាត់ដំបង ៖
ជនសង្ស័យចំនួន០៤នាក់ជាប់ពាក់ព័ន្ធករណីលួចគាស់ហិបដាក់បច្ច័យនិងទ្រព្យសម្បត្តិក្នុងវត្តចំនួនពីរផ្សេងគ្នានៅក្នុងក្រុងបាត់ដំបងត្រូវបានកម្លាំងកងរាជអាវុធហត្ថខេត្តបាត់ដំបងឃាត់ខ្លួន
និងបញ្ជូនទៅតុលាការកាលពីរសៀលថ្ងៃទី២៧ ខែកុម្ភៈ ឆ្នាំ២០២៦ម្សិលមិញ។
យោងតាមរបាយការណ៍របស់មន្ត្រីអាវុធហត្ថខេត្តបានបញ្ជាក់ថា
ជនសង្ស័យត្រូវបានឃាត់ខ្លួន ទី១-ឈ្មោះ រ៉េត ភិរម្យភេទប្រុស អាយុ២៨ឆ្នាំ
រស់នៅស្រុកឯកភ្នំ។ ទី២-ឈ្មោះ កែវ សុខជា ភេទប្រុស អាយុ ៣៩ឆ្នាំ ។ ទី៣-ឈ្មោះ សុខ សុភ័ក្រ្ត
ភេទប្រុស អាយុ៣៦ឆ្នាំ ។ ៤-ឈ្មោះ សាម សំរិទ្ធ ភេទប្រុស អាយុ៣៧ឆ្នាំ
ទាំង០៣នាក់រស់នៅក្មុងក្រុងបាត់ដំបង ។
បន្ទាប់ពីធ្វើការសួរបំភ្លឺនិងស៊ើបអង្កេតសមត្ថកិច្ចកំណត់បានថា
ជនល្មើសដែលប្រព្រឹត្តសកម្មភាពលួចក្នុងវត្តទាំងពីរករណីខាងលើគឺ ឈ្មោះ ធឿន ម៉េងហុង ហៅ
ម៉េង ភេទប្រុសអាយុ២៥ឆ្នាំ ទីលំនៅមិនពិតប្រាកដត្រូវបានស្នងការនគរបាលខេត្តចាប់ខ្លួនកាលពីព្រឹកថ្ងៃទី២៦
ខែកុម្ភៈ ឆ្នាំ២០២៦ ។ ចំណែកឈ្មោះ រ៉េត ភិរម្យ
ជាអ្នកដឹកជនល្មើសដើររកកន្លែងលក់អំភ្លីនិង mixer ដែលជនល្មើសលួចបានពីក្នុងវត្តសង្កែ រីឯឈ្មោះ សាម សំរិទ្ធ ជាអ្នកយកម៉ិចស័រនិងអំភ្លីដែលឈ្មោះ ម៉េង លួចបានទៅលាក់ក្នុងរថយន្តរបស់ខ្លួន
ហើយដឹកជូនជនល្មើសដើរពឹងពាក់គេដើម្បីឲ្យជួយរកកន្លែងលក់ ហើយក៏ជួបឈ្មោះ រ៉េត ភិរម្យ
ក៏ប្រគល់ឲ្យរ៉េត ភិរម្យដឹកឈ្មោះ ម៉េង ដើររកកន្លែងលក់ ចំណែកឈ្មោះ សុខ សុភ័ក្រ្ត
ជាអ្នកទទួលទិញអំភ្លីនិងមិចស័រពីឈ្មោះ ម៉េងនិងឈ្មោះ រ៉េត ភិរម្យ ក្នុងតម្លៃ
០៨ម៉ឺនរៀល ។
គួរបញ្ជាក់ផងដែរថា ករណីទី១-នៅចន្លោះម៉ោង ០៣និង០០'ដល់ម៉ោង ០៤និង០០'នាទីទាបភ្លឺ ឈានចូលថ្ងៃទី២៤
ខែកុម្ភៈ ឆ្នាំ២០២៦ នៅក្នុងវត្តដំរីស ភូមិកំពង់ក្របី សង្កាត់ស្វាយប៉ោ
ក្រុងបាត់ដំបង ជនសង្ស័យខាងលើបានធ្វើសកម្មភាពគាស់ដំបូលសាលាឆាន់ចូល គាស់ហិបដាក់បច្ច័យរបស់វត្តចំនួន
០៧ហិប សរុបជាទឹកប្រាក់ប្រមាណជា ២០ម៉ឺនរៀល។
ករណីទី២-នៅចន្លោះម៉ោង ០៤និង០០នាទី ដល់ម៉ោង ០៥និង០០នាទីទៀបភ្លឺ ឈានចូលថ្ងៃទី២៤ ខែកុម្ភៈ ឆ្នាំ២០២៦ ជនសង្ស័យបានចូលក្នុងសាលាឆាន់នៅវត្តសង្កែ ស្ថិតក្នុងភូមិរំចេក៤ សង្កាត់រតនៈ ក្រុងបាត់ដំបង លួចយកសម្ភារៈ ៖ អង្ករ ០៦ការ៉ុង ,បច្ច័យ(លុយ)ក្នុងហិបប្រមាណ១០ម៉ឺនរៀល ,Speaker JBL ចំនួន០១ តម្លៃ៧០០ដុល្លារ ,Mixer ចំនួន ០១ តម្លៃ ១០០ដុល្លារ , អំភ្លី ចំនួន ០១ ៕
ដោយ ៖ សាលី