បាត់ដំបង
៖ ដើម្បីចូលរួមពង្រឹងសន្តិសុខ សណ្តាប់ធ្នាប់
និងរក្សាសុវត្ថិភាពសាធារណៈនៅក្នុងមូលដ្ឋាន នៅព្រឹកថ្ងៃទី២០ ខែតុលា ឆ្នាំ២០២៦
សមត្ថកិច្ចជំនាញចម្រុះបានចុះប្រតិបត្តិការប្រមូលជនអនាថារាប់សិបនាក់
ដែលប្រទះឃើញធ្វើដំណើរ និងស្នាក់នៅតាមសំណង់អាណាធិបតេយ្យទីសាធារណៈនានា
ក្នុងក្រុងបាត់ដំបង។
ក្នុងប្រតិបត្តិការនេះ
សមត្ថកិច្ចបាននាំជនអនាថាសរុបចំនួន ៧៨នាក់ ស្រី៨នាក់
បញ្ជូនទៅកាន់អធិការដ្ឋាននគរបាលក្រុងបាត់ដំបងដើម្បីធ្វើការសាកសួរ
ស្រាវជ្រាវអត្តសញ្ញាណ និងធ្វើតេស្តពិនិត្យរកសារធាតុញៀន
ក្នុងនោះរកឃើញអ្នកផ្ទុកសារធាតុញៀនចំនួន ៦៦នាក់ និងជនវិបល្លាសមានចំនួន ១២នាក់ ។
ចំពោះអ្នកដែលពាក់ព័ន្ធនឹងការប្រើប្រាស់
ឬករណីផ្សេងៗ សមត្ថកិច្ចនឹងចាត់វិធានការតាមច្បាប់ និងនីតិវិធីជាធរមាន គោលបំណងទប់ស្កាត់បទល្មើស
និងបញ្ហាសង្គមដែលអាចកើតមាន ព្រមទាំងចូលរួមរក្សាសន្តិសុខ សណ្តាប់ធ្នាប់
និងសុវត្ថិភាពជូនប្រជាពលរដ្ឋ និងភ្ញៀវទេសចរ នៅក្នុងក្រុងបាត់ដំបង។
ជាមួយគ្នានេះ សមត្ថកិច្ចក៏បានអំពាវនាវដល់ប្រជាពលរដ្ឋទាំងអស់ ឱ្យចូលរួមសហការរាយការណ៍ជូនសមត្ថកិច្ចនៅពេលប្រទះឃើញសកម្មភាពគួរឱ្យសង្ស័យ ឬបញ្ហាដែលអាចបង្កផលប៉ះពាល់ដល់សន្តិសុខ និងសណ្តាប់ធ្នាប់សាធារណៈ ដើម្បីរួមគ្នាកសាងសង្គមមួយដែលមានសុវត្ថិភាព និងមានសណ្តាប់ធ្នាប់ល្អ ៕
ដោយ ៖
សាលី