បាត់ដំបង ៖ នៅថ្ងៃទី៩ ខែតុលា
ឆ្នាំ២០២៦នេះ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី
អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ
បានអញ្ជើញដឹកនាំកិច្ចប្រជុំពិនិត្យវាយតម្លៃផលប៉ះពាល់ខូចខាតដោយជំនន់ទឹកភ្លៀង
និងរៀបចំផែនការឆ្លើយតបវិស័យកសិកម្មនៅខេត្តបាត់ដំបង។
ឯកឧត្តម សុខ លូ គូសបញ្ជាក់ថា ដំណាំស្រូវនៅទូទាំងខេត្តបាត់ដំបងរងគ្រោះដោយសារជំនន់ទឹកភ្លៀងមានចំនួន
១២២ ៣០៩ ហិកតា និងខូចខាត ៦៨ ៧៤៣ ហិកតា ហើយដំណាំសាកវប្បកម្ម និងឧស្សាហកម្មប៉ះពាល់
១៥ ៧៨៤ ហិកតា និងខូចខាត ៧ ៨១៥ហិកតា ប្រជាពលរដ្ឋរងគ្រោះជំនន់ទឹកភ្លៀងប៉ះពាល់ ៥១
២២១គ្រួសារ និងខូចខាត ២៩ ៣៧០គ្រួសារ ស្មើនឹង ៩៤ឃុំ សង្កាត់។
ជាមួយគ្នានេះ ឯកឧត្តមកិត្តិសង្គហបណ្ឌិត គន់ គីម បានណែនាំដល់រដ្ឋបាលខេត្ត
រដ្ឋបាលក្រុង-ស្រុក ឃុំ និងមន្ទីរជំនាញពាក់ព័ន្ធឱ្យបន្តចុះវាយតម្លៃ
ធ្វើបច្ចុប្បន្នភាព ផលប៉ះពាល់ ខូចខាត និងរៀបចំផែនការស្តារឡើងវិញឱ្យបានជាក់លាក់
ព្រមទាំងកំណត់ឱ្យច្បាស់ពីគ្រួសារដែលរងគ្រោះ ក៏ដូចជាស្ថានភាពដំណាំ
និងលទ្ធភាពដាំដុះស្តារឡើងវិញ និងលទ្ធភាពទឹកស្រោចស្រព
សម្រាប់សុំគោលការណ៍រាជរដ្ឋាភិបាលដើម្បីពិនិត្យលទ្ធភាពដោះស្រាយផ្តល់គ្រាប់ពូជស្រូវ
គ្រាប់ពូជដំណាំរួមផ្សំ និងស្បៀងជូនគ្រួសាររងគ្រោះ
និងគ្រួសារខ្វះខាតឱ្យបានទាន់ពេលវេលា ព្រមទាំងជួសជុលហេដ្ឋារចនាសម្ព័ន្ធដែលខូចខាត។
ឯកឧត្តម គូសបញ្ជាក់ថា ការវាយតម្លៃផលប៉ះពាល់ឱ្យបានច្បាស់លាស់
និងការឆ្លើយតបឱ្យបានទាន់ពេលវេលា គឺជាមូលដ្ឋានសំខាន់ក្នុងការជួយស្តារជីវភាព
និងផលិតកម្មរបស់ប្រជាកសិករដែលរងគ្រោះ៕
ដោយ ៖ សាលី