បន្ទាយមានជ័យ ៖ អាជ្ញាធរកម្ពុជា
នៅថ្ងៃទី២១ ខែតុលា ឆ្នាំ២០២៦នេះ បានបណ្តេញជនជាតិថៃចំនួន
២៤នាក់ភាគីថៃក៍បានបញ្ជូនជនជាតិខ្មែរ៨២នាក់ ត្រឡប់មកកម្ពុជាវិញផងដែរតាមច្រកអន្តរជាតិប៉ោយប៉ែត។
លោកឧត្តមសេនីយ៍ត្រី អ៊ី ចំរើន
នាយប៉ុស្តិ៍នគរបាលអន្តោប្រវេសន៍ច្រកទ្វារប៉ោយប៉ែត
បានអោយដឹងថា អនុវត្តតាមប្រសាសន៍ណែនាំដ៏ខ្ពង់ខ្ពស់របស់ឯកឧត្ដមអភិសន្តិបណ្ឌិត
ស សុខា ឧបនាយករដ្ឋមន្ត្រី រដ្ឋមន្តី្រក្រសួងមហាផ្ទៃ ឯកឧត្ដម ឧត្ដមសេនីយ៍ឯក សុខ
វាសនា អគ្គនាយកអន្តោប្រវេសន៍ និងលោកឧត្ដមសេនីយ៍ទោ ស៊ឹម ចាន់ណាក់
ប្រធាននាយកដ្ឋានច្រកទ្វារទី១នៅថ្ងៃទី២១ ខែតុលា ឆ្នាំ២០២៦ វេលាម៉ោង ១០:០០នាទីព្រឹក
លោកបានដឹកនាំមន្ត្រីក្រោមឱវាទសហការជាមួយកម្លាំងស្នាក់ការត្រៀមបណ្ដេញចេញខេត្តសៀមរាប
នាយកដ្ឋានស៊ើបអង្កេត និងអនុវត្តនីតិវិធី អគ្គនាយកដ្ឋានអន្តោប្រវេសន៍
ដឹកនាំដោយលោកឧត្ដមសេនីយ៍ទោ យឿម ម៉ាន់ អនុប្រធាននាយកដ្ឋានស៊ើបអង្កេត
និងអនុវត្តនីតិវិធី លោក លៀម សុដា អភិបាលរងខេត្តបន្ទាយមានជ័យ
និងស្ថាប័នពាក់ព័ន្ធធ្វើការបញ្ជូនពលរដ្ឋថៃចេញពីប្រទេសចំនួន ២៤នាក់ ក្នុងនោះស្រី
០៩នាក់ (ពាក់ព័ន្ធករណីលួចស្នាក់នៅធ្វើការងារខុសច្បាប់
និងបទចូលដោយទុច្ចរិតក្នុងទីលានយោធា) ។ ក្នុងពេលជាមួយគ្នានេះផងដែរ
ក្រុមការងារក៍បានទទួលពលរដ្ឋខ្មែរឆ្លងដែនខុសច្បាប់ពីអាជ្ញាធរថៃចំនួន ៨២នាក់
ក្នុងនោះស្រី ២៤នាក់ កុមារ ១០នាក់ ព្រមទាំងបានចែកអាហារសម្រន់ជូនដល់ពួកគាត់ពិសារមានបាយ
និងទឹកសុទ្ធគ្រប់ៗគ្នា ។
អនុវត្តតាមការណែនាំពលរដ្ឋខ្មែរខាងលើ
នគរបាលប៉ុស្តិ៍បានផ្តល់អាហារជាបាយនិងទឹកចែកជូនពលរដ្ឋគ្រប់គ្នានិងបានធ្វើសម្រង់សាវតាតម្កល់ទុកនៅអង្គភាព
បន្ទាប់មកជួយដឹកជញ្ជូនយកទៅប្រគល់ជូនមន្ត្រី នៃមជ្ឈមណ្ឌលសំចតប៉ោយប៉ែត
ដើម្បីអនុវត្តនីតិវិធីបន្ត។
សូមបញ្ជក់ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី
ហ៊ុន ម៉ាណែត កំពុងបន្តយុទ្ធនាការបង្ក្រាប និងបោសសម្អាតបទល្មើសឆបោកតាមប្រព័ន្ធអនឡាញ
និងបទល្មើសឆ្លងដែនគ្រប់ប្រភេទ ដោយបន្តអនុវត្តវិធានការយ៉ាងម៉ឺងម៉ាត់
ដើម្បីរក្សាសន្តិសុខ សណ្តាប់ធ្នាប់ និងកិត្យានុភាពជាតិ៕
