បាត់ដំបង ៖ នៅរសៀលថ្ងៃទី២១ ខែកញ្ញា
ឆ្នាំ២០២៦ សាខាកាកបាទក្រហមកម្ពុជាខេត្តបាត់ដំបង ដែលមានឯកឧត្តម សុខ លូ
អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត
បានអញ្ជើញចុះប្រគល់-ទទួលផ្ទះមនុស្សធម៌ចំនួន ២ខ្នង
និងចែកអំណោយមនុស្សធម៌ជូនដល់ប្រជាពលរដ្ឋទីទ័លក្រចំនួន ៥០គ្រួសារ ស្ថិតនៅភូមិកាប់គោថ្មី សង្កាត់អូរចារ
ក្រុងបាត់ដំបង ។
ក្នុងឱកាសនោះដែរ ឯកឧត្តម សុខ លូ បានមានប្រសាសន៍ថា
ការចែកអំណោយមនុស្សធម៌ជាគ្រឿងឧបភោគបរិភោគជូនដល់ប្រជាពលរដ្ឋដែលមានជីវភាពទីទ័លក្រ
និងងាយរងគ្រោះចំនួន ៥០គ្រួសារ និងការផ្តល់ជូនផ្ទះថ្មីនាពេលនេះ
គឺជាការឆ្លើយតបយ៉ាងទាន់ពេលវេលា និងផ្តល់ជម្រកដ៏កក់ក្តៅ
សុវត្ថិភាពឡើងវិញជូនពួកគាត់ដើម្បីជួយសម្រាលបន្ទុកជីវភាពរស់នៅប្រចាំថ្ងៃផងដែរ។
បន្ថែមពីនេះ ឯកឧត្តម សុខ លូ បានពាំនាំនូវប្រសាសន៍សួរសុខទុក្ខ
និងក្តីនឹករលឹកយ៉ាងជ្រាលជ្រៅពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី
ហ៊ុនសែន ប្រធានកាកបាទក្រហមកម្ពុជា
ដែលជានិច្ចកាលតែងតែយកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់បងប្អូន
ប្រជាពលរដ្ឋនៅគ្រប់ទិសទី។
ជាមួយគ្នានេះ ឯកឧត្តម ក៏បានផ្តាំផ្ញើដល់គ្រួសារទទួលផលទាំងអស់
សូមថែរក្សាមរតកដ៏មានតម្លៃដែលពុំអាចកាត់ថ្លៃបានទាំងនេះ
ឱ្យបានគង់វង្សឋិតឋេរយូរអង្វែងសម្រាប់កូនចៅតទៅមុខទៀត
ពិសេសត្រូវយកចិត្តទុកដាក់គិតគូរចំពោះសុខភាព ការរក្សាអនាម័យ និងការសម្អាតបរិស្ថាន
ចូលរួមគោរពច្បាប់ចរាចរណ៍ និងចៀសឆ្ងាយពីគ្រឿងញៀនផងដែរ។
ជាកិច្ចឆ្លើយតប គ្រួសារទទួលបានផ្ទះថ្មីទាំងពីរ
និងប្រជាពលរដ្ឋទាំងអស់ បានសម្តែងនូវក្តីរំភើបរីករាយជាអនេក
និងបានថ្លែងអំណរគុណយ៉ាងជ្រាលជ្រៅចំពោះកាកបាទក្រហមកម្ពុជាដែលមាន
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន និង ឯកឧត្តម សុខ លូ
ប្រធានគណៈកម្មាធិការសាខា ព្រមទាំងអាជ្ញាធរខេត្តបាត់ដំបង ដែលបានគិតគូរ
និងជួយសង្គ្រោះពួកគាត់នៅក្នុងគ្រាលំបាកបំផុតនេះ
ជាពិសេសទទួលបានផ្ទះថ្មីស្រឡាងដែលមិននឹកស្មានដល់ថានឹងមានជម្រកយ៉ាងសមរម្យស្រស់ស្អាតបែបនេះទេ
៕
ដោយ ៖ សាលី