បាត់ដំបង ៖ កាលពីថ្ងៃទី១៦ ខែឧសភា
ឆ្នាំ២០២៦ ស្របតាមអនុសាសន៍ដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ ស ថេត
អគ្គស្នងការនគរបាលជាតិ និងការចង្អុលទិសដឹកនាំរបស់លោកឧត្តមសេនីយ៍ទោ ដាញ់
អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង លោកវរសេនីយ៍ឯក ពេជ្រ សារ៉ែន
អធិការនគរបាលក្រុងបាត់ដំបង
បានដឹកនាំកម្លាំងជំនាញចុះធ្វើការបង្រ្កាបករណីហិ-ង្សាដោយចេតនា
បង្កទំនាស់ដាក់គ្នាទៅវិញទៅមក រវាងបុរសពីរក្រុមដោយធ្វើការនាំខ្លួនចំនួន ០៤នាក់។
សមត្ថកិច្ចបានបញ្ជាក់ថា ជនសង្ស័យទាំង០៤នាក់រួមមាន
៖ ១-ឈ្មោះ ម៉ី សុវណ្ណគីរី ភេទប្រុស អាយុ៣៦ឆ្នាំ មានទីលំនៅភូមិកំពង់ក្របី
សង្កាត់ស្វាយប៉ោ ក្រុងបាត់ដំបង, ២-ឈ្មោះ អៀង ឧត្តមសុផានិត ភេទប្រុស អាយុ២៥ឆ្នាំ
មានទីលំនៅភូមិទួលតាឯក សង្កាត់ទួលតាឯក ក្រុងបាត់ដំបង, ៣-ឈ្មោះ វន សិលា ភេទប្រុស
អាយុ២៨ឆ្នាំ មានទីលំនៅភូមិទួលតាឯក សង្កាត់ទួលតាឯក ក្រុងបាត់ដំបង, ៤-ឈ្មោះ ទឹម
សំណាង ភេទប្រុស អាយុ៤១ឆ្នាំ មានទីលំនៅភូមិទួលតាឯក សង្កាត់ទួលតាឯក ក្រុងបាត់ដំបង
។
សមត្ថកិច្ចបានបញ្ជាក់ទៀតថា
កាលពីវេលាម៉ោង០២និង៣០នាទីរំលងអាធ្រាត្រនាថ្ងៃទី១៥ ខែឧសភា ឆ្នាំ២០២៦
ឈានចូលថ្ងៃទី១៦ ខែឧសភា ឆ្នាំ២០២៦ នៅចំណុចក្រុមទី១៩ ភូមិកំពង់ក្របី សង្កាត់ស្វាយប៉ោ
ក្រុងបាត់ដំបង មានករណីហិ-ង្សានេះកើតឡើង
ដោយទំនាស់ពាក្យសំដីរវាងបុរស០២ក្រុមប្រដាប់ដោយដុំថ្មដាក់គ្នាទៅវិញទៅមកបង្កឱ្យមានការភ្ញាក់ផ្អើលទាំងកណ្តាលរាត្រីដល់ប្រជាពលរដ្ឋនៅចំណុចកើតហេតុខាងលើ។
ក្រោយទទួលបានព័ត៌មាននេះ
លោកអធិការនគរបាលក្រុងបានដឹកនាំទៅដល់កន្លែងកើតហេតុ
តែក្រុមបង្កបានបំបែកគ្នាចាកចេញពីកន្លែងកើតហេតុ
តែសមត្ថកិច្ចបន្តស្រាវជ្រាវរហូតឈានទៅនាំខ្លួនពួកគាត់ចំនួន០៤នាក់ក្នុងចំណោមបក្សពួកផ្សេងទៀតដែលកំពុងគេចខ្លួន
នាំមកកាន់អធិការដ្ឋាននគរបាលក្រុងបាត់ដំបងដើម្បីធ្វើការសាកសួរ។
លោកវរសេនីយ៍ឯក ពេជ្រ សារ៉ែន
បានឱ្យដឹងថា
ទាំងពីរក្រុមនេះបានទាស់ពាក្យសំដីដាក់គ្នារហូតឈានទៅប្រើហិ-ង្សាទៅវិញទៅមក
បង្កការភ្ញាក់ផ្អើលកណ្តាលក្រុងបាត់ដំបង ហើយពេលនេះនគរបាលក្រុងបានរៀបចំកសាងសំណុំរឿងបញ្ជូនទៅអនុវត្តកំហុសតាមផ្លូវច្បាប់នៅសាលាដំបូងខេត្តបាត់ដំបង។
គួរបញ្ជាក់ជូនថានារាត្រីដដែលនេះ ក៏មានករណីហិ-ង្សាមួយទៀតកើតឡើង នៅកណ្តាលក្រុងបាត់ដំបង បង្កឱ្យមានការភ្ញាក់ផ្អើលពីមហាជនដែលធ្វើដំណើរតាមដងផ្លូវ ដោយទិដ្ឋភាពនេះត្រូវបានផ្សព្វផ្សាយក្នុងបណ្តាញសង្គម ហើយមកដល់ពេលនេះ ក្រោមបទបញ្ជាដឹកនាំរបស់លោកឧត្តមសេនីយទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង សមត្ថកិច្ចកំណត់អត្តសញ្ញាណនៃគូរទំនាស់នោះបានហើយ អាចឈានទៅនាំខ្លួនមកធ្វើការសាកសួរ និងចាត់វិធានការតាមច្បាប់ចំពោះករណីអាណាធិបតេយ្យកណ្តាលក្រុងបែបនេះ ៕
ដោយ ៖ សាលី