បន្ទាយមានជ័យ ៖ ប្រជាពលរដ្ឋរងគ្រោះខូចខាតផ្ទះសម្បែងដោយសារជម្លោះព្រំដែន
ដែលយោធាថៃបានបំផ្លិចបំផ្លាញ ចំនួន១៩៧គ្រួសារ
ស្ថិតនៅក្នុងស្រុកថ្មពួក បានទទួលអំណោយមនុស្សធម៌
របស់សាខាកាកបាទក្រហមខេត្តបន្ទាយមានជ័យ នាថ្ងៃទី១៨ ខែមីនា ឆ្នាំ២០២៦ ។
ឯកឧត្តម អ៊ុំ រាត្រី ប្រធានគណៈកម្មាធិការសាខាកាកបាទក្រហមខេត្តបន្ទាយមានជ័យ
បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត
ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា និងបានចូលរួមសោកស្ដាយ
ក្នុងការបាត់បង់ផ្ទះសម្បែងរបស់បងប្អូន ដែលត្រូវរងការខូចខាត
ដោយសារពួកចោរសៀមឈ្លានពានបូរណភាពទឹកដី ដោយមានការរាយបន្លាលួស ដាក់ទូកុងតឺន័រ
ហ៊ុមព័ទ្ធយកដី របស់បងប្អូន ធ្វើឲ្យមានភាពលំបាក
ប៉ុន្តែរាជរដ្ឋាភិបាលបានយកចិត្តទុកដាក់
ចំពោះការស្នាក់នៅបណ្តោះអាសន្ននៅក្នុងជំរុំសុវត្ថិភាព ថែមទាំងបានធ្វើការសាងសង់ផ្ទះជូនបងប្អូនបានស្នាក់នៅសមរម្យជាបណ្តើរៗ
។
ជាមួយគ្នានេះដែរ ឯកឧត្ដមបានមានប្រសាសន៍ថ្លែងអំណរគុណ និងដឹងគុណដ៏ជ្រាលជ្រៅបំផុតចំពោះវីរៈកងទ័ព
ដែលបានពលី ក្នុងបុព្វហេតុការពារបូរណភាពទឹកដី អធិបតេយ្យជាតិ
ពីការរំលោភបំពានរបស់យោធាថៃ និងសូមគោរពអរគុណជាអនេកចំពោះវរៈកងទ័ពជួរមុខទាំងអស់ ដែលបាននិងកំពុងឈរជើងតាមខ្សែបន្ទាត់ព្រំ
និងសូមបួងសួងសុំឲ្យកងទ័ពទាំងអស់ ព្រមទាំងក្រុមគ្រួសារ សូមមានសុខភាពល្អ
និងទទួលបានជ័យជម្នះ ឈ្នះអស់មារសត្រូវ ។
គួរបញ្ជាក់ថា អំណោយដែលបានផ្តល់ជូន ក្នុង១គ្រួសារ ទទួលបានអង្ករ ២៥គីឡូក្រាម, មីខ្លាឃ្មុំ ២៥កញ្ចប់, ទឹកត្រីមួយយួរ, ទឹកស៊ីអ៊ីវមួយយួរ និងថវិកាមួយចំនួន ៕
