បាត់ដំបង ៖ នៅព្រឹកថ្ងៃទី៣០ ខែមករា ឆ្នាំ២០២៦នេះ
ឯកឧត្តម ព្រួញ រិទ្ធថា ទីប្រឹក្សាឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី
រដ្ឋមន្ត្រីក្រសួងមហាផ្ទៃ និងជាប្រធានមន្ទីរសាធារណការ និងដឹកជញ្ជូនខេត្តបាត់ដំបង
បានអញ្ជើញចុះពិនិត្យការដ្ឋានសាងសង់ផ្លូវបេតុងលេខ៤០៩មួយខ្សែ ប្រវែង៨៥០ម៉ែត្រ
ទទឹង៥ម៉ែត្រ ស្ថិតនៅក្នុងសង្កាត់ទួលតាឯក ក្រុងបាត់ដំបង។
ក្នុងឱកាសអញ្ជើញចុះពិនិត្យការដ្ឋានសាងសង់ផ្លូវបេតុងខាងលើ
ឯកឧត្តម បានបញ្ជាក់ថា សម្រាប់ឆ្នាំ២០២៦នេះ
មន្ទីរសាធារណការខេត្តទទួលបានគម្រោងអភិវឌ្ឍន៍ខ្សែផ្លូវចំនួន៦ខ្សែពីរាជរដ្ឋាភិបាល តាមរយៈក្រសួងសាធារណការនិងដឹកជញ្ជូន
ហើយសម្រាប់ផ្លូវលេខ៤០៩ ដែលកំពុងពន្លឿនការសាងសង់នេះ
គឺជាផ្លូវមួយខ្សែក្នុងចំណោមផ្លូវចំនួន៦ខ្សែដែលមន្ទីរសាធារណការខេត្ត
បានទទួលគម្រោងពីក្រសួងសាធារណការ និងដឹកជញ្ជូន ក្នុងឆ្នាំ២០២៦នេះ។
ឯកឧត្តមបានបញ្ជាក់ទៀតថា ពាក់ព័ន្ធលើការងារស្ថាបនាពង្រីកផ្លូវ
លេខ៤០៩នេះ គឺក្រុមការងារបច្ចេកទេស
និងធ្វើការកាយបកដីគ្មានគុណភាពចេញនិងរៀបចំធ្វើគ្រឹះថ្មី
ដោយក្រាលល្បាយថ្មម៉ិចនិងកៀរកិនបង្ហាប់ទៅតាមស្តង់ដារបច្ចេកទេស
និងបន្ទាប់មករៀបចំក្រាលកម្រាលសរសៃដែកតាមប្លង់បច្ចេកទេស
ដើម្បីបន្តធ្វើការចាក់ល្បាយបេតុងកម្រាស់១៥សង់ទីម៉ែត្រនិងបន្តថែទាំបេតុងដោយស្រោចទឹក
ហើយក្នុងពេលថែទាំបេតុងហាមមិនឱ្យធ្វើចរាចរណ៍ឆ្លងកាត់លើផ្លូវមួយរយៈ
រហូតដល់បេតុងរឹងមាំល្អទើបបើកឲ្យចរាចរណ៍ធម្មតាឡើងវិញ។
ជាមួយគ្នានេះ ឯកឧត្តម ព្រួញ រិទ្ធថា ក៏បានអំពាវនាវទៅដល់បងប្អូនប្រជាពលរដ្ឋដែលប្រើប្រាស់ដីចំណីផ្លូវសូមឲ្យមានការចូលរួមនៅពេលដែលរដ្ឋត្រូវការបង្ខិតរបងសំយ៉ាបឬតម្រូវអោយកាត់អ្វីសូមឱ្យមានការចូលរួមដើម្បីសោភ័ណភាពក្រុងរបស់យើងផង និងមួយវិញទៀតបើសិនជាយើងបានពង្រីកផ្លូវឲ្យធំទូលាយ យើងមិនមានការកកស្ទះ និងកាត់បន្ថយគ្រោះថ្នាក់ចរាចរណ៍ ដូច្នេះសូមមានការចូលរួមដោយស្មារតីទទួលខុសត្រូវខ្ពស់ ពីព្រោះក្រុមការងារបានបាញ់ថ្នាំជូនរួចអស់ហើយដោយវាស់ចេញពីអាក់ប៉ុន្មានម៉ែត្រប៉ុន្មានម៉ែត្រទាំងខាងឆ្វេងដៃនិងខាងស្ដាំដៃ ព្រោះកាលណាយើងអាចដោះដីចំណីផ្លូវរួចរាល់ទាំងអស់ទើបយើងអាចដំណើរការស្ថាបនាផ្លូវក្នុងក្រុងយើងជាបណ្ដើរៗបន្តទៅទៀត តែក្នុងករណីផ្លូវណាដែលមិនទាន់ដោះដីចំណីផ្លូវបានទេយើងក៏មិនអាចស្ថាបនាបានដែរ ៕
ដោយ ៖ សាលី