ឯកឧត្តម ឃួន ផុនរតនៈ ជួបសម្តែងការគួរសម ជាមួយលោកជំទាវ Bernadette Therese C. Fernandez ឯកអគ្គរដ្ឋទូតហ្វីលីពីនប្រចាំសាធារណរដ្ឋកូរ៉េ

 

សាធារណរដ្ឋកូរ៉េ ៖ ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ នៅថ្ងៃទី១២ ខែមករា ឆ្នាំ២០២៦ បានអញ្ជើញជួបសម្តែងការគួរសម និងពិភាក្សាការងារជាមួយលោកជំទាវ Bernadette Therese C. Fernandez ឯកអគ្គរដ្ឋទូតហ្វីលីពីនប្រចាំសាធារណរដ្ឋកូរ៉េ នៅស្ថានទូតហ្វីលីពីនប្រចាំទីក្រុងសេអ៊ូល។

ក្នុងឱកាសនៃជំនួបនេះ ភាគីទាំងពីរ បានផ្លាស់ប្ដូរយោបល់លើបញ្ហាតំបន់ និងព្រឹត្តិការណ៍អន្តរជាតិសំខាន់ៗ ដែលបានកើតឡើងនាពេលថ្មីៗកន្លងមកនេះ ព្រមទាំងវិធានការផ្សេងៗក្នុងការរក្សាសុខសុវត្ថិភាពជូនប្រជាជននៃប្រទេសទាំងពីរដែលកំពុងរស់នៅ និងបំរើការងារនៅប្រទេសកូរ៉េ។

បន្ថែមពីនេះ ភាគីទាំងពីរក៏បានពិភាក្សាអំពីការពង្រឹងកិច្ចសហប្រតិបត្តិការរវាងស្ថានតំណាងនៃប្រទេសទាំងពីរសំដៅលើកកម្ពស់ប្រសិទ្ធិភាពការងារ និងគាំទ្រគ្នាទៅវិញទៅមកក្នុងការបំពេញបេសកកម្មការទូតនៅប្រទេសកូរ៉េនេះ។