បាត់ដំបង ៖
កម្លាំងនគរបាលចរាចរណ៍នៃអធិការដ្ឋាននគរបាលស្រុកសង្កែ ដែលមានលោកវរសេនីយ៍ទោ យុត តុងហូ
ជាអធិការ នៅព្រឹកថ្ងៃទី១៥ ខែតុលា ឆ្នាំ២០២៦នេះ បានចុះធ្វើការអប់រំ ផ្សព្វផ្សាយ
និងណែនាំដល់ប្រជាពលរដ្ឋ និងអ្នកធ្វើដំណើរតាមដងផ្លូវ
អំពីការគោរពច្បាប់ចរាចរណ៍ផ្លូវគោក ដើម្បីចូលរួមកាត់បន្ថយគ្រោះថ្នាក់ចរាចរណ៍
និងលើកកម្ពស់សុវត្ថិភាពក្នុងការធ្វើដំណើរ។
ក្នុងការចុះអប់រំនេះ
កម្លាំងនគរបាលបានណែនាំដល់អ្នកបើកបរឱ្យគោរពសិទ្ធិអាទិភាព បើកបរតាមល្បឿនកំណត់
មិនបើកបរលើសល្បឿន មិនបើកបរទាំងមានជាតិស្រវឹង
និងត្រូវពាក់មួកសុវត្ថិភាពឱ្យបានត្រឹមត្រូវនៅពេលធ្វើដំណើរដោយម៉ូតូ
ព្រមទាំងត្រូវប្រុងប្រយ័ត្ន និងគោរពស្លាកសញ្ញាចរាចរណ៍គ្រប់ពេលវេលា។
ជាមួយគ្នានេះលោកវរសេនីយ៍ទោ យុត តុងហូ
អធិការនគរបាលស្រុកសង្កែ ក៏បានចូលរួមអំពាវនាវដល់បងប្អូនប្រជាពលរដ្ឋ
និងអ្នកប្រើប្រាស់ផ្លូវទាំងអស់ ត្រូវចូលរួមគោរពច្បាប់ចរាចរណ៍
និងមានស្មារតីយោគយល់អធ្យាស្រ័យគ្នា ដើម្បីធានាសុវត្ថិភាពក្នុងការធ្វើដំណើរ
និងរួមចំណែកកាត់បន្ថយការកើតមានគ្រោះថ្នាក់ចរាចរណ៍នៅក្នុងមូលដ្ឋាន។
លោកបានបញ្ជាក់ថា សកម្មភាពអប់រំផ្សព្វផ្សាយនេះ គឺជាការចូលរួមរបស់កម្លាំងនគរបាលក្នុងការលើកកម្ពស់ការយល់ដឹង និងការអនុវត្តច្បាប់ចរាចរណ៍របស់ប្រជាពលរដ្ឋ សំដៅធានាសុវត្ថិភាព សណ្តាប់ធ្នាប់ និងសុខសុវត្ថិភាពជូនប្រជាពលរដ្ឋគ្រប់រូប ៕
ដោយ ៖ សាលី