បាត់ដំបង ៖ យ៉ាងហោចណាស់បុរសជនជាតិខ្មែរម្នាក់បានស្លាប់ភ្លាមៗ
និងបុរសខ្មែរចិន០៧នាក់ផ្សេងទៀតរងរបួសធ្ងន់ក្រោយជួបឧបទ្ទវហេតុគ្រោះថ្នាក់ចរាចរណ៍រវាងរថយន្តបុកគូថរថយន្តនៅវេលាម៉ោង
០៨និង១០នាទីព្រឹក ថ្ងៃទី២៥ ខែមករា ឆ្នាំ ២០២៦ នៅតាមបណ្តោយផ្លូវហៃវ៉េ
ស្ថិតក្នុងក្រុមទី១៤ ភូមិច្រាបក្រសាំង សង្កាត់វត្តគរ ក្រុងបាត់ដំបង។
ប្រភពនៅកន្លែងកើតហេតុបានប្រាប់ថាករណីគ្រោះថ្នាក់ចរាចរណ៍ខាងលើបានកើតឡើងរវាងរថយន្តម៉ាកហ៊ីយ៉ាន់ដាយ
ពណ៌សមួយគ្រឿង ពាក់ផ្លាកលេខ កំពង់ធំ.3A-1472
បើកបរដោយបុរសម្នាក់ទិសដៅពីត្បូងទៅជើង ចំណែករថយន្តមួយគ្រឿងទៀតម៉ាក ALPHARD ពណ៌ស ពាក់ផ្លាកលេខភ្នំពេញ.2CF-0607
បើកបរដោយបុរសជនជាតិខ្មែរម្នាក់
និងអ្នករួមដំណើរជាបុរសជនជាតិខ្មែរ០២នាក់និងចិន០៥នាក់
ក្នុងល្បឿនយ៉ាងលឿនបានជ្រុលមកបុកពីក្រោយរថយន្តដឹកទំនិញពីក្រោយពេញទំហឹង
បណ្តាលអោយបុរសជនជាតិខ្មែរម្នាក់បានស្លាប់ភ្លាមៗ និងបុរសខ្មែរចិន០៧នាក់ផ្សេងទៀតរងរបួសធ្ងន់
ចំណែករថយន្តខូចខាតយ៉ាងដំណំ។
ក្រោយពេលកើតហេតុសមត្ថកិច្ចជំនាញបានចុះទៅដឹកបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យ និងបានវាស់វែងធ្វើកំណត់ហេតុយករថយន្តទាំងពីរគ្រឿងមករក្សាទុកនៅការិយាល័យចរាចរណ៍ផ្លូវគោកដើម្បីចាត់ការតាមផ្លូវច្បាប់ ចំណែកសពត្រូវបានដឹកយកទៅកម្កល់ទុកនៅវត្តបច្ឆា ក្នុងក្រុងបាត់ដំបង ៕
ដោយ ៖ សាលី